Wie ner bestimmt wisse is heit jo de erschde offizielle pälzische Twitter- un Blogdah!
Ich han noch garnix uff pälzisch gebloggt heit un als allewei de Ultes sei Blogbeitrach freigeb hat, is mer die Idee kumm, was ich schreib! Frät mich ibrischens, dass de Ultes des noch geschafft hat!
Zur Vorgeschicht: Ich war jo mol e Zeit lang bei de Pfadfinder un dert lernt mer ah des en orre annere Lied, des mer enfach net so schnell vergesse duht. Dodezu gehert es Lied vum echte Pälzer Buh!
Mei Pfadfindergrupp hat des damals mol uff irgend ähm Singewettstreit gesung un dentweh kenn ich des Lied. Un so gehts:
Ich bin en echte pälzer Bu, de stärkscht vun unsrer Gass,
un wer die pälzer Buwwe kennt, des is e edli Rass!
Kä Schlipsche un kä Kraache nä, des is uns viel zu dum!
Mer flieschen jo- de gonze Dag- im Chausseegrawe rumUnn wann zwä Pälzer Hännel hann, des is ä wahri Fräd,
en Fremder wo vorüwwer geht, vergesst’s sei Lebdach net
die Wörder die do flie’e riwwer un niwwer üwwer de Disch
die stehn in käm’ Lexikon
die sinn jo noch ganz frisch!Horsch do mil hie—des klingt gonz pälzerisch—holariaho
Voller Witz un voller Schneid
Wie babble do die Leid
Vor so’rer Ausdrucksweis hat jedermann Respekt!
Des is un bleibt ä unverfälschtes Pälzer Dialekt!Ei, du Bangert ei du Schäler,
ei du Rindvieh, du Kamel,
ei was bisch’de donn ver äner
ei was guck’sche dann so schäl
ei du haschd in doinem Läwe noch kä Kannelwasser gsoff-
wann ich dich am Krawutschel nemm,
dann sauf’sche awwer doch!Horsch do mil hie—des klingt gonz pälzerisch—holariaho
Voller Witz un voller Schneid
Wie babble do die Leid
Vor so’rer Ausdrucksweis hat jedermann Respekt!
Des is un bleibt ä unverfälschtes Pälzer Dialekt
Is des net e schennes Liedche? Also ich finds schä!
Die änzisch Version vun dem Lied, die ich uf duRöhre gefunne hab, is von rem Kinnerchor gesunge, awwer des macht jo nix:
Jetz im Ohschluss noch e schennes Liedche, des ich besunnersch gut fin:
“Kumm schdoß mol uff mei Schatz ich riech die Lewwerworscht so gern!”
Moie gebbts noch e klenni Zammefassung iwwer heit! 
beim pälzer bu fehlt ä stroph:
zwä buwe spiele klickerschers un krien minanner krach
eh, geb mer mo mei klicker her sunsch kriesche eh uffs dach!!
ich du der dei bulinscher butze bis das de sternscher siesch
un trät der in dei klicker noi bis das de mänsch du fliesch.
Do hosche awwer Glick gehatt, beinächst hätt isch aach des Lied do genumm! ;-)
Do isses doch.
un die spielen noch mehr so Sache uff pälzisch
Gruß vum Pälzerbu
Do iss was net richtich geloffe:
http://www.youtube.com/watch?v=7lg5R1KNH3c
Gruß
Pälzerbu